Bydd y gweithdai yn gyfle i glywed siaradwyr gwadd yn trafod eu profiadau o ddigido ac yn rhoi cipolwg ar botensial sydd gan ddigido i gyfoethogi casgliadau, estyn allan i’r sector addysg a grwpiau cymunedol, yn ogystal â’i ddefnydd ar gyfer arddangosfeydd a marchnata.

Bydd pawb sy’n mynychu yn derbyn copi o ganllawiau digido Culturenet Cymru sy’n cynnwys modiwlau ar hawlfraint, metadata, paratoi sganwyr a sganio, paratoi delweddau ar gyfer y we, archifo digidol a chadwraeth.  Maent yn ganllawiau syml gyda chamau hawdd i’w dilyn yn ogystal â ffynonellau gwybodaeth a chyngor pellach.

Bydd staff Culturenet Cymru a CyMAL yn bresennol yn y digwyddiadau i ateb cwestiynau a chynnig cyngor ar elfennau amrywiol digido – o chwilio am gyllid i sut ma’ arddangos eich casgliadau ar y we, a phopeth rhwng y ddau!

Dewch i’n gweld yn y llefydd canlynol:

2 Mawrth – Galeri, Caernarfon

3 Mawrth – Y Ganolfan Adnoddau Cyfryngol, Llandrindod Wells

4 Mawrth – Canolfan Dylan Thomas, Abertawe

Cynhelir pob digwyddiad rhwng 10 a 1.30 a bydd cinio ar gael ym mhob un.  I archebu lle, ewch i wefan Cymal…

Ar ddydd Sadwrn, 31 Hydref, gosododd Culturenet Cymru ei offer yn Neuadd Goffa Pontyberem ar gyfer diwrnod o ddigido gyda phobl Cwm Gwendraeth.

Dros yr wythnosau diwethaf, gwahoddwyd pobl Cwm Gwendraeth i ddod a’u trysorau a’u hatgofion gyda hwy i Bontyberem i greu cofnod digidol o hanes eu cymunedau.

Cawsom ddiwrnod llwyddiannus ym Mhontyberem gyda thrigolion yr ardal yn galw i rannu hanesion am y Cwm gyda ni.   Cafwyd nifer o eitemau diddorol ac amrywiol yn sôn am Ferched Beca, yr ymgyrch i achub Llangyndeyrn rhag boddi, hanes pyllau glo y Cwm ac atgofion am sefydlu Menter Cwm Gwendraeth.

Mae’r gweithgaredd yn cyd-ddigwydd ag agor arddangosfa’r Llyfrgell Genedlaethol yn y neuadd. Bydd yr arddangosfa o luniau yn ymwneud a Chwm Gwendraeth yno tan Ddydd Iau, 11 Tachwedd, ac mae mynediad am ddim.

Daeth nifer dda o aelodau’r cymunedau cyfagos i’r noson ac, yn ogystal a chyfweliad gydag Emyr Wyn, cafwyd cyflwyniadau gan staff Llyfrgell Genedlaethol Cymru, Llyfrgell Sir Gaerfyrddin a Culturenet Cymru.

Cafodd rhai o hen luniau teuluol Emyr Wyn eu digido gan Culturenet yn y digwyddiad. Byddwn yn dychwelyd i Gwm Gwendraeth ar ddydd Sadwrn, 31 Hydref, pan fyddwn yn cynnal diwrnod digido yn Neuadd Goffa Pontyberem rhwng 10 a 4.

Mae Culturenet Cymru wedi cynnal y cyntaf o bedwar peilot hyfforddiant digido sydd i’w cynnal rhwng nawr a diwedd mis Mawrth. Daeth staff amgueddfa, archifdy a llyfrgell Ynys Mon ynghyd i Langefni ar gyfer y diwrnod hyfforddiant ar 20 Hydref.

Wrth i nifer gynyddol o bartneriaid Culturenet Cymru roi cynnig ar eu rhaglenni digido eu hunain, rydym yn awyddus i weld sut allwn ni rannu ein gwybodaeth a’n profiad yn y maes hwn gyda hwy. Cyflwynir yr hyfforddiant fel modd o’u galluogi i gyfrannu’n uniongyrchol at wefan <em>Casgliad y Bobl</em> unwaith y bydd wedi’i lansio.

Dros y tri mis diwethaf, mae Culturenet wedi bod yn datblygu ‘toolkit’ i gefnogi’r hyfforddiant a bydd hwnnw ar gael i’w lawrlwytho o’r wefan hon.

I gael y newyddion diweddaraf am Gasglu’r Tlysau tanysgrifiwch i gyflenwad newyddion RSS newydd y wefan.

Trwy glicio ar yr icon oren yn ym mlwch cyfeiriad eich porwr rhyngrwyd, bydd modd i chi gael y newyddion diweddaraf am brosiect Casglu’r Tlysau yn syth – o ychwanegiadau newydd, i newyddion y prosiect o’r swyddfa.

Dros yr wythnosau nesaf, bydd cannoedd o ddelweddau newydd yn ymddangos ar y wefan. Mae ein Swyddogion Prosiect wedi bod wrthi’n ddyfal yn digido casgliadau Undeb Rygbi Cymru, Neuadd Enwogion Cymru a Chlwb Criced Morgannwg ymhlith eraill, a bydd rhain i gyd i’w gweld yn fuan.

Felly, os hoffech chi fod y cyntaf i wybod pan fydd y casgliadau cyffrous yma ar y wefan, ychwanegwch RSS Casglu’r Tlysau i far offer eich porwr gwe!

Helpodd grwp Archifau Cymunedol Cymru, Atgofion Machen, ei ysgol gynradd leol i ddathlu ei chanmlwyddiant yn ddiweddar.

Ar 22 Ionawr dathlodd Ysgol Gynradd Machen 100 mlynedd ers iddi agor yn swyddogol ym 1909 gyda diwrnod yn llawn o weithgareddau a rhannu atgofion. Daeth cyn-ddisgyblion ac athrawon, yn ogystal â phwysigion lleol o Gyngor Caerffili i dreulio diwrnod a ddechreuodd gyda gwasanaeth ysgol.

Wedi bore o wersi i’r plant, agorwyd yr ysgol i’r cyhoedd ac roedd cyn-ddisgyblion yn gallu ail-fyw eu dyddiau ysgol gyda thaith o amgylch yr ysgol yng nghwmni’r prifathro ac edrych ar yr arddangosfeydd a drefnwyd gan Machen Remembered. Gallai’r plant weld sut roedd bywyd ysgol wedi newid ers dyddiau eu rhieni a’u neiniau a’u teidiau drwy ddarllen hen lyfrau log sydd o hyd yn cael eu cadw yn yr ysgol.

Mae llawer o aelodau Atgofion Machen yn gyn-ddisgyblion ac yn gyn-athrawon yn Ysgol Gynradd Machen ac yn hapus i ymuno yn y dathliadau, yn enwedig gan eu bod yn medru dod â chipluniau o hanes yr ysgol. Mae archif digidol Atgofion Machen yn cynnwys delweddau o agoriad swyddogol yr ysgol ac o ddosbarthiadau dros y ganrif ddiwethaf. Mae yna hefyd ddelwedd o Mr Inkin, prifathro cyntaf Machen a fu yn yr ysgol ers iddi agor nes iddo ymddeol ym 1935.

Mae gwaith y grwp yn chwarae rhan bwysig yn dogfennu hanes cymuned Machen, fel roedd y diwrnod hwn yn dangos. Mae’r ysgol wedi bod yn ganolbwynt yng nghymuned Machen ers canol y ddeunawfed ganrif. Cafodd yr ysgol bresennol ei hadeiladu i ddisodli un arall a oedd yn dioddef o ymsuddiant gan ei bod yn agos i bwll glo’r pentref. Yn y 100 mlynedd ers iddi agor ei drysau, mae miloedd o ddisgyblion wedi cael eu haddysgu yno ac mae’r ysgol wedi ennill enw fel canolfan rhagoriaeth.

Mae archif digidol Atgofion Machen ar wefan Archifau Cymunedau Cymru yn cynnwys dros 250 o ddelweddau ac mae’n dal i dyfu.

I weld mwy o ddelweddau o’u harchif, cliciwch yma (yn anffodus, nid yw fersiwn Gymraeg tudalennau Machen yn hollol weithredol ar hyn o bryd)

Cafodd arddangosfa ei chynnal yn ddiweddar ym Mhrifysgol Rio Grande, Ohio, yn dathlu arwyr mwyaf Cymru. Crëeodd y Cymrawd Ymchwil 2008 Benjy Davies 20 o ddarluniau digidol gwreiddiol yn seiliedig ar bleidlais 100 Arwyr Cymru Culturenet Cymru.

Mae’r gwaith celf yn dathlu arweinwyr hanesyddol a chyfoes ym meysydd barddoniaeth, celf, cerddoriaeth a gwleidyddiaeth, yn cynnwys Owain Glyndwr, Richard Burton, Catherine Zeta Jones ac enillydd y bleidlais Aneurin Bevan. Mae’r delweddau digidol yn cyfuno portreadau, dyluniadau, patrymau a pheintio rhithwir a cawsant eu harddangos mewn dau safle yn ne-ddwyrain Ohio, ardal a ddenodd llawer o wladychwyr o Gymru yn ystod y ddeunawfed a’r bedwaredd ganrif ar bymtheg.

Prosiect Ymchwil Madog 2008 yw’r arddangosfa. Mae Canolfan Madog, sydd wedi’i henwi ar ôl Tywysog Madog, a honnir iddo ddarganfod America cyn Christopher Columbus, yn gynnyrch Cymdeithas Gogledd America ar gyfer Astudiaeth Diwylliant a Hanes Cymru, ac mae wedi’i lleoli yn un o aneddiadau mwyaf Cymry America yn yr UDA. Mae gan y Ganolfan gysylltiadau agos gyda Llyfrgell Genedlaethol Cymru drwy’r Prosiect Cymru – Ohio.

Mae’r arddangosfa’n dangos fod gwaith Culturenet yn ymestyn dros y byd, yn hyrwyddo diwylliant a threftadaeth Cymru. Yn ystod y mis diwethaf, mae gwefan Casglu’r Tlysau wedi derbyn dros 10,000 o ymweliadau oddi wrth yr Unol Daleithiau, gan gynnwys dros 200 o dalaith Ohio.

Mae’r adnoddau digidol ar-lein a ddarperir gan Culturenet Cymru yn caniatáu i dreftadaeth a diwylliant Cymru gael eu gweld a’u mwynhau’n rhyngwladol. Trwy ddigido a dehongli ar-lein, mae’n bosibl i Gymru i weld gweddill y byd a gweddill y byd i weld Cymru!

I weld yr arddangosfa ar-lein, cliciwch yma.

Pwrpas Gwobr ‘Talking Hands’ yw gwobrwyo awduron gwefannau sydd, ‘drwy eu rhagoriaeth greadigol, yn darparu gwefan sy’n dysgu, sy’n cynnwys elfennau dysgu digonol, a sydd yn rhoi rhywbeth o werth sylweddol i ymwelwyr wedi iddynt ddychwelyd i’w gweithgareddau bob dydd arferol, a fydd yn eu galluogi i fod yn ddinasyddion gwell yn y byd.’ (o wefan ‘Talking Hands’)

Mae tîm Casglu’r Tlysau yn hapus iawn i dderbyn y wobr hon, a’r gobaith yw y bydd ymwelwyr i’r wefan yn teimlo eu bod wedi dysgu am dreftadaeth a diwylliant Cymru wrth iddynt adael. Mae dros 30,000 o ddelweddau ar y safle, ac mae Casglu’r Tlysau’n cynnig mynedfa i archwilio’r tlysau sy’n guddiedig mewn amgueddfeydd, archifau a llyfrgelloedd y wlad.

Ers ail-lansiad gwefan Casglu’r Tlysau ym mis Awst 2008 mae wedi bod yn datblygu’n gyson. Mae’r tîm wedi bod yn gweithio i ddigido hyd yn oed mwy o gynnwys a bydd yn cyhoeddi delweddau o gasgliadau fel casgliad Undeb Rygbi Cymru, Neuadd Arwyr Chwaraeon Cymru, Casgliad Beicio Cenedlaethol yn Llandrindod a Chlwb Criced Sir Forgannwg.

Edrychwch arnynt ar www.tlysau.org.uk

Rhyfedd, efallai, yw meddwl y gallai teganau o’ch plentyndod chi fod mewn amgueddfa ond mae gan Amgueddfa Plentyndod Gorllewin Cymru gasgliad hyfryd o dedis, doliau, ceir, a theganau amrywiol a fydd yn sicr o ddeffro atgofion.

Mae Amgueddfa Plentyndod Cymru wedi ei leoli mewn hen ffermdy yn Llangeler, y tu allan i Gaerfyrddin. Mae ymweld â’r amgueddfa fel camu ‘nôl i’ch plentyndod gyda thros ganrif o chwarae plant i’w weld yno.

Mae Casglu’r Tlysau yn falch o gael casgliad o eitemau o’r amgueddfa sy’n adlewyrchu sut mae teganau ac arferion chwarae plant wedi newid dros amser. O’r ddoli bren symlaf o ddechrau’r bedwaredd ganrif ar bymtheg, i’r teganau a ysbrydolwyd gan gyfresi teledu a’r arferion hamdden diweddaraf, dangosa’r casgliad sut mae diwylliant poblogaidd wedi dylanwadu ar chwarae plant.

Mae yna sawl eitem yn y casgliad sydd yn amlwg yn dod o Gymru, fel y pyrsiau a rhubanau Eisteddfodol a fyddai wedi bod yn wobr i genedlaethau o blant mewn Eisteddfodau lleol. Ond roedd teganau yn cael eu cynhyrchu yng Nghymru a oedd yn cael eu hallforio ledled y byd gan gwmn?au fel Mettoy a Louis Marx & Co. yn Abertawe. Roedd nifer ohonynt wedi eu hysbrydoli gan raglenni teledu a ffilmiau’r cyfnod, megis casgliad modelau deigastedig Corgi o geir Chitty Chitty Bang Bang, Batmobile, The Avengers ac Aston Martin DB5 James Bond a gynhyrchwyd gan Mettoy. Roedd y cwmni enfawr Americanaidd Louis Marx & Co. a oedd yn Abertawe yn cynhyrchu teganau poblogaidd fel y Daleks o’r gyfres deledu Dr Who yn ystod y 1960au a’r 1970au.

Mae’r adroddiad yn cynnig arolwg o sut y mae Culturenet wedi bod yn gweithio i hybu a dathlu hanes a threftadaeth Cymru ar y we dros y flwyddyn ddiwethaf, gan gynnwys datblygiad prosiect newydd, cyffrous. Am fwy o wybodaeth, cliciwch yma

Yn ystod 2007-2008 gwelwyd barhad yng nghynnydd prosiectau Culturenet ac estyniad yn y rheiny sy’n elwa o’r prosiectau hynny. Yn ogystal, datblygwyd berthynas gwerthfawr gyda nifer o wahanol gyfranwyr a sicrhawyd lle Casglu’r Tlysau, fel y prif gasgliad o ddelweddau digidol yn ymwneud a hanes Cymru a’r Cymry.

Gyda datblygiad prosiect Archifau Cymunedol Cymru mae Culturenet yn gweithio gyda grwpiau gwahanol yng nghymdeithas i gynyddu’r defnydd o dechnoleg gwybodaeth ac i hybu ymdeimlad o falchder ac o berthyn i gymuned trwy arddangos hanes eu cymuned ar y we.
Yn yr un modd, mae Maes y Gad i Les y Wlad (MYGLYW), prosiect sy’n creu straeon digidol o’r cyfnod rhwng 1939 a 1959, wedi dod â disgyblion ysgol ac aelodau o’r gymuned sy’n cofio’r cyfnod at ei gilydd i gyd-weithio mewn ffordd bositif a dyfeisgar.

I ddarllen yr adroddiad yn llawn dilynwch y linc isod:
Adroddiad Blynyddol

Cafwyd arddangosfa ysblennydd o ffrogiau priodasol yng Nghanolfan Cymunedol Brynaman yn ddiweddar. Roedd yr arddangosfa, a drefnwyd gan grwp Archifau Cymunedol Cymru Brynaman yn ddathliad o bob dim yn ymwneud â phriodas: ffrogiau, hetiau, esgidiau, lluniau, gwahoddiadau, bwydlenni, hyd yn oed biliau ac anfonebau! Ymhlith y pigion oedd ffrog wedi ei wneud o sidan parasiwt o gyfnod yr Ail Rhyfel Byd a gwisg yn dyddio o’r 1870au.

Trefnwyd yr arddangosfa fel rhan o waith grwp Treftadaeth Brynaman gydag Archifau Cymunedol Cymru i ddathlu a rhannu hanes eu pentref. Roedd yr eitemau yn yr arddangosfa yn dyddio o gyfnod o dros ganrif ac yn dangos yn glir sut mae ffasiynau wedi newid dros amser, yn ôl gofynion y cyfnod. Rhoddwyd yr eitemau yn garedig i’r arddangosfa gan drigolion lleol ac un peth sy’n amlwg yw fod gan briodferch y rhyddid i wneud yn union fel y myn hi ar ddiwrnod ei phriodas!

Roedd yr arddangosfa yn ffrwyth llafur wythnosau a misoedd o waith gan aelodau grwp Brynaman a mae’n adlewyrchu’r ymroddiad y mae pob un o’r 11 grwp cymunedol yn rhoi i’r prosiect. Mae’r arddangosfa wedi rhoi’r cyfle i’r grwp ddangos i’w teuluoedd, ffrindiau, cymdogion ac ymwelwyr y ffordd y maent yn rhannu hanes eu cymdeithas ar-lein.
Mae delweddau o eitemau’r arddangosfa bellach i’w gweld ar wefan Archifau Cymunedol Cymru

Yn dilyn llwyddiant cyfres deledu’r ‘Coalhouse’ gan BBC Cymru, a welodd tri theulu, pedwar o Fois Bevin, a faciwîs, yn dysgu i ymdopi â bywyd ym Mlaenafon yn ystod yr Ail Rhyfel Byd, beth am ddarganfod atgofion y bobl sy’n wir yn cofio sut oedd bywyd yn y cyfnod hwnnw?

Yn ystod y gyfres bu’n rhaid iddynt ddysgu i ymdopi â dogni, y ‘blac-owt’ a’r ofn beunyddiol o gyrchoedd awyr, ond ar yr un pryd roeddent yn tynnu at ei gilydd fel cymuned. Diolch i ddau brosiect cyffrous gan Culturenet, gallwch gymharu’r profiadau hynny gydag atgofion byw o’r cyfnod.

Mae Eu Gorffennol Eich Dyfodol a Maes y Gad i Les y Wlad yn adrodd hanesion unigolion a fu’n byw trwy’r 1940au a’r 1950au.

Mae Maes y Gad i Les y Wlad yn dod â chyn-filwyr a thystion o’r cyfnod rhwng 1939 ac 1959 a disgyblion ysgol ynghyd i greu straeon digidol. Mae’r ffilmiau byr 2-3 munud hyn, a wnaed gan y disgyblion, yn cyfuno delweddau llonydd gydag atgofion y genhedlaeth h?n mewn ffordd arloesol sy’n helpu i wella’u dealltwriaeth o’r gorffennol.

Gellir defnyddio cynnwys y ddwy wefan hyn fel adnoddau diddorol ac addysgol cyffrous, i roi mewnwelediad i fywydau rhieni, teidiau a hendeidiau. Mae tîm addysg Culturenet hefyd yn gweithio ar adnoddau’n gysylltiedig â phump o themâu prosiect: Rhyfel a Gwrthdaro, Coffâd a Chymod, Gwaith a Chyflogaeth a Gwleidyddiaeth a Chymdeithas. Bydd yr holl adnoddau addysgol ar gael yn y misoedd i ddod a gellir eu llwytho i lawr.

Mae Eu Gorffennol Eich Dyfodol yn coffau’r Ail Ryfel Byd drwy atgofion y bobl a fu’n byw trwyddo. Nid yw’r wefan yn unig yn deyrnged barhaol i’r bobl a fu’n byw drwy’r cyfnod ond hefyd yn adnodd dysgu gwerthfawr i genedlaethau’r dyfodol.

Os hoffech wybod y gwirionedd am fywyd yn ystod yr Ail Ryfel Byd, ymwelwch â gwefan Maes y Gad i Les y Wlad ac Eu Gorffennol Eich Dyfodol

Bydd Culturenet Cymru yn bresennol ar faes yr Eisteddfod eleni ar stondin Llyfrgell Genedlaethol Cymru ac yn rhoi cyfle arbennig i ymwelwyr fod yn rhan o’n prosiectau ni.

Eleni mae gan Culturenet arddangosfa rhyngweithiol a rydym yn annog ymwelwyr i gyfrannu eu meddyliau ar ystod o ddelweddau oddi ar wefan Casglu’r Tlysau. Mae hanes ein cenedl wedi’i wreiddio mewn atgofion a phrofiadau pobl fel chi a fi a rydym yn awyddus i ddarganfod pa deimladau mae’r delweddau yma’n ysgogi ynoch chi.

Cymerwch ran trwy ychwanegu eich sylwadau i’n arddangosfa rhyngweithiol neu rhannwch eich teimladau a’ch meddyliau am Gaerdydd a’u cael wedi recordio ar offer sain.
Cyfrannwch at gof cenedl trwy rannu eich atgofion gyda ni ar faes yr Eisteddfod

Bydd Culturenet Cymru hefyd yn lansio gwefan Casglu’r Tlysau newydd ar ddydd Iau’r ‘Steddfod ynghyd â chyfle i gael eitemau o’ch eiddo chi wedi’u digido gan ein tîm. Os oes gennych, lun, llythyr, tocyn, rhaglen neu gerdyn post yr hoffech gael wedi digido dewch i’n stondin a rhoddwch eich hanes chi ar gof a chadw.

Am ragor o wybodaeth, cysylltwch â:

Culturenet Cymru
Llyfrgell Genedlaethol Cymru,
Aberystwyth, Ceredigion, SY23 3BU
Ffôn: +44 (0)1970 632500
e-bost: newyddion@culturenetcymru.com

Noddir Culturenet Cymru, a leolir yn Llyfrgell Genedlaethol Cymru, gan Lywodraeth Cynulliad Cymru.

Mae Archifau Cymunedol Cymru (ACC) yn gweithio gyda grwpiau cymunedol ledled Cymru i greu archifau digidol o’u hanes a’u treftadaeth. Yn ddiweddar mae ACC wedi creu grwp ar Flickr – y wefan rhannu delweddau – gyda’r bwriad o ehangu’r prosiect y tu allan i’r grwpiau presennol.
Mae ACC yn gweithio i ddweud stori eich Cymru Chi.

Hoffai ACC wybod os oes gan unrhyw un luniau o’r tu fewn i Gapel y Tabernacl cyn iddo gael ei ddinistrio, o unrhyw gyfnod yn ei hanes boed ddoe neu heddiw.

Hoffai ACC ddiogelu hanes yr adeilad arwyddocaol yma trwy ofyn i chi ymuno â’n grwp Flickr ar www.flickr.com/groups/cymru-wales.

Rydym yn gwahodd unrhyw un â lluniau o du mewn i’r adeilad i fod yn rhan o gofnodi hanes y capel trwy gyfrannu eu delweddau i’r grwp Flickr. Gall rhain wedyn ddod yn rhan o grwp cymunedol Cymru Ni.

Gallwch weld delweddau presennol grwpiau cymunedol ACC a’r gwaith mae’r prosiect yn ei wneud trwy ymweld â’r brif wefan: www.cymruni.org.uk

Am ragor o wybodaeth, cysylltwch â:

Culturenet Cymru
Llyfrgell Genedlaethol Cymru,
Aberystwyth, Ceredigion, SY23 3BU
Ffôn: +44 (0)1970 632500
e-bost: newyddion@culturenetcymru.com

Noddir Culturenet Cymru, a leolir yn Llyfrgell Genedlaethol Cymru, gan Lywodraeth Cynulliad Cymru.